De Wuilus haet vánaovend gruuëts ziene 75e Prins oetgeraope. In ein bomvol BMV De Vilgaard waort Prins Lars (Van Wijlick) en zien adjudante Ramon (Uylings) en Leike (Evers) geprissentaerd ás ’t nieje Trio ván De Wuilus.
Prins Lars I is 24 jaor en studeert commerciële economie aan de Fontys Hoeëgeschoel in Eindhove. Hae is aanvoerder ván ’t ierste elftal ván IVO Velde en leidde de ploeg in 2025 naor ’t kampioenschap in de vaerde klasse. Daonaeve vervult hae diverse funksies binne de vereiniging.
Adjudant Ramon (24) werkt ás recruitment consultant beej ENJOB Personeelsdiensten. Adjudant Leike (24) is werkzaam ás accountmanager beej PreZero. Alledreej zien ze nauw betrokke beej ’t Veldese vereinigings- en voetballaeve, waorónder ’t Top-D Toernooi, ’t Penantietoernooi en IVO Velde.
Volges de statute is de Prins woeënachtig in Velde, tradisiegetrouw naet in de ech verbonde, naet samewoeënend en nag gen dertig jaor. ’t Nieje Trio geit Velde veur mit Gekke Maondaag, dae opniej vaer daag lang in de groeëte fieëstent beej de BMV gevierd geit waere.
Prins Lars I en zien adjudante Ramon en Leike halde eure resepsie op zaoterdaag 17 jannewari um 19:30 aor beej BMV De Vilgaard. Nao aafloup is d’r groeët fieës mit diverse artieste, waorónder d’n band Wiendkrácht 11.