De Wuilus haet vánaovend mit trots zien 72e Prins oètgeraope. In ein bomvolle BMV De Vilgaard waort Prins Willem (Koopmans) d’n Twieëde en zien Adjudante Jason (Hafmans) en Niels (Vestjens) oètgeraope wies nieje Trio.
Prins Willem II is 22 jaor, studeert Marketing in Nimwaege en haet zien eige reclameburo. Hae speult ónder andere in de nieje Veldese revue, is bestuurslid beej de Durpfieëste Velde en verzurgt de PR vur diverse organisasies. Adjudant Jason is ok 22 jaor en werkt ás credit controller beej Viking Direct. Adjudant Niels is 25 jaor en guf les op basisschoel De Brink in de Melderse. ’t Trio mak deil oèt ván de zanggroep Enne Bink, die aafgelaupe jaor ièrste waorte tiejes ’t Liedjesmatinee ván De Wuilus.
Prins Willem II en zien Adjudante Jason & Niels halde op zaoterdaag 21 jannewarie resepsie in BMV De Vilgaard vánaaf 19:30. Nao de resepsie is d’r groeët fieës mit Pruuf Mar en Willy aus Kevelaer.
’t Nieje Trio geit Velde vur in ein beejzondere Gekke Maondaag, dae nao ’t sukses ván de veurjaorsedisie in 2022 opniej mit ’t ganse durp gevierd geit waere in ein fieëstent vur De Vilgaard. Gekke Maondaag is dit jaor op 30 jannewarie en de optoch trekt ás um 13:49 door de Veldese straote.
Volges de statute is de Prins woeënachtig in Velde, tradisiegetrouw naet in de ech verbonde, naet samewoeënend en nag gen dertig jaor.