Zóndaagmiddaag 3 oktoeëber waord tiejes ’t Liedjesmatinee ein beejzondere primeur gegaeve aan ’t aanwezige publiek: de prissentasie ván ’t nieje opkomstlied ván De Wuilus. Daor ’t coronavirus en ’t daomei seizoen dát in rauk opging haet De Wuilus de kans en ruumte aangegraepe um de planne veur ein niej opkomstlied in werking te zette.

Pim Geelen en Maarten Jansen hebbe veur de teks geteikend, terwijl Dave Detillon & Dave Ververgaard de meziek hebbe bedach. Vervolges is ’t nummer ingezonge door Arno Arts, Giovanni Brueren, Camiel van Dongen, Ron Deenen en Rob Allard, artieste die hun spore inmiddels verdeend hebbe binne òs Kieëzerièk. Mit às resultaat, ein geweldig niej vuulzijdig opkomstlied, waomei De Wuilus tiejes eur eige evenemente mei binne kump mar ok in de kefees. Às ièrste kint geej live getuuge zien ván ’t nieje opkomstlied tiejes òs Zittinge op 13 & 14 november: kaarte waere volgende waek zóndaag verkoch beej Het Wapen van Velden, vánaaf 11:00.

‘Weej Zien De Wuilus’ is vánaaf nouw te beluustere via Spotify en YouTube.